Pubblichiamo “Si terra d’oleandri e gelsuminu”, una poesia in siciliano sulla nostra amata isola tratta dal libro “Stiddi a primavera”, Target Editrice Enna, 1997. L’autrice è Geppina Macaluso, una poetessa molto conosciuta e apprezzata per la bellezza delle sue liriche. Alcune sue composizioni possono essere ascoltate su You Tube.

Si terra d’oleandri e gelsuminu

Si terra d’oleandri e gelsuminu

di citronella valicu spicuzza

rosi ginestri gigli rosmarinu

di frisca nipitedda ’nta rastuzza

La zagara d’aranci e dî limuna

spanni lu sciauru dâ Chiana â Conca d’Oru

t’intruscia tuttu d’estati cu dda luna

ti fa cadiri ’n on sonnu di ristoru

Di ’n capu a rama ti ridi lu granatu

di nne paliddi li duci ficudinii

a racina è oru ’nzuccaratu

di mennuli cci nn’è arbuli chini

I persichi cu i facci di villutu

s’affacciano d’ammenzu i virdi fogli

dunanu all’estate u benvenutu

aspittannu ’na bedda ca li cogli

Si terra ginirusa e ’mprofumata

fusti fatta cu tutti li ricchizzi

ti ficiru li manu di ’na fata

lu suli ti fa luciri i biddizzi

Lu mari azzurru e virdi di cristallu

ti vasa jornu e notti comu un zitu

lu celu chiaru o russu di corallu

t’abbrazza e ti talìa d’ogni situ

Di notti quannu tu si addurmintata

a luna e i stiddi ti guardanu ’i luntanu

pisci d’argentu ti fannu a serenata

cu ’na chitarra l’unu e un marranzanu

Ti cantanu li storî e li canzuni

di li genti c’abitarru ccà cu tia

si terra ranni hai un cori di liuni

lu to splenduri m’afferra m’ammalìa

Hai forti di muntagni la carina

ca vanu di l’unu a l’autru capu

ddà si respira aria frisca e fina

u virdi a calma a paci d’ogni latu

Ma ’n capu a tuttu si spinci a muntagnazza

c’havi un purtusazzu d’unni fuma

spissu s’arrabbia s’infuria s’arramazza

spara botti ca parunu cannuna

Ietta petri ’i focu dâ so vucca

l’arrizzola pi tutti li so' scianchi

arbuli strati casi si l’ammucca

nun resta nenti di socchi havi davanti

Nê so' vallati prospera la vigna

ca duna un vinu russu comu u sangu

l’arbulu d’olivu puru alligna

vidi chi nesci fori di ddu fangu

Sunu oru i campagni di l’internu

quannu 'ngrana u furmentu a metà giugnu

ti dunanu a mangiari stati e 'mmernu

chiddu ca meti era chiusu ’n on pugnu

Mari di spichi c’adasciu annaca u ventu

russu di papaveri e autri sciuri

si comu u meli si fatta pi l’amuri

si china di biddizzi a centu a centu

Ti vogliu beni terra meravigliusa

mi piaci sempri cu lu scuru o u lusciu

tu si a cchiù megghiu terra ca canusciu

Sicilia bedda Sicilia favulusa